Anëtari i Lëvizjes së Deçanit mund të dënohet 5 deri në 8 vite burgim për nxitje të urrejtjes fetare
Në Gjykatën Themelore në Prishtinë është dorëzuar kallëzim penal ndaj Belisar Jezerci, anëtar i “Lëvizjes së Deçanit”, për dyshimin e kryerjes së veprës penale “Nxitja e përçarjes dhe mosdurimit” mbi baza fetare.
Kallëzimi është parashtruar nga avokati Asdren Bytyqi, i cili ka deklaruar se Jezerci, përmes postimeve në rrjetet sociale, ka bërë thirrje që nxisin urrejtje ndërfetare dhe përçarje mes qytetarëve.
Sipas kallëzimit penal, Jezerci dyshohet se ka përdorur gjuhë anti islame, duke e cilësuar islamin si ideologji primitive dhe duke bërë thirrje për zhdukjen e tij nga trevat shqiptare, çka konsiderohet cenim serioz i bashkëjetesës dhe rendit publik.
Bazuar në Kodin Penal të Republikës së Kosovës, vepra penale e nxitjes së urrejtjes, përçarjes dhe mosdurimit mbi baza fetare dënohet me gjobë ose me burgim deri në 5 vjet, ndërsa në rast të rrethanave rënduese, dënimi mund të shkojë deri në 8 vjet burgim.
Avokati Bytyqi ka theksuar se do të ndjekë të gjitha rrugët ligjore për trajtimin e kësaj çështjeje dhe ka kërkuar që institucionet e drejtësisë të reagojnë me seriozitet ndaj rasteve që nxisin urrejtje dhe përçarje në shoqëri.
