Ekskluzive | Zbardhet vjedhja në autolarjen “GoWash” në Fushë Kosovë – tre persona përfundojnë në ndalim
Është zbardhur rasti i vjedhjes së rëndë që kishte ndodhur më 22 shkurt në rrugën “Besa-Besë” në Fushë Kosovë, ku ishin dëmtuar rëndë pajisjet e një autolarjeje.
Ngjarja ishte raportuar rreth orës 08:30, pasi njësia patrulluese kishte konstatuar thyerjen e autolarjes “GoWash”. Pronari, G. M. kishte njoftuar se tre aparate për pagesë dhe aktivizim të autolarjes ishin hapur me forcë dhe dëmtuar. Sipas tij, vetëm në njërin aparat ndodheshin rreth 200 euro para të gatshme, ndërsa dëmi i përgjithshëm në pajisje kap vlerën rreth 10 mijë e 500 euro.
Nga analizimi i kamerave të sigurisë është vërejtur se rreth orës 06:13 në vendin e ngjarjes shfaqen tre persona, dy prej tyre të maskuar. Fillimisht, identiteti i tyre nuk ishte arritur të konfirmohej.
Pas veprimeve intensive hetimore, më 26 shkurt policia ka arrestuar tre të dyshuar për këtë rast: dy të mitur të moshës 16 vjeçare dhe një 19-vjeçar.
Me urdhër të prokurorit kujdestar nga departamentet përkatëse, dy të miturit janë dërguar në mbajtje për 24 orë, ndërsa i dyshuari tjetër është ndaluar për 48 orë.
Rasti po hetohet si “Vjedhje e rëndë”.
Sinjali – aty ku e vërteta flet para lajmit!
