Profesori dyshohet se goditi me grushte në fytyrë nxënësin, këto janë fjalët e tij

Një incident shqetësues është raportuar më 19 shkurt në Prizren, ku një nxënës i mitur dyshohet se është sulmuar fizikisht nga profesori i tij brenda ambienteve shkollore.

Burime të besueshme nga strukturat e afërta me hetimin bëjnë të ditur për Sinjalin se rreth orës 12:50, në rrugën “Hoxhë Tahsini”, viktima R.K., rreth 17-vjeçar – nxënës i SHML “11 Marsi” – ka raportuar se është goditur disa herë me grushte në fytyrë nga profesori i tij, B. K., rreth 52-vjeçar.

Të miturit i është ofruar menjëherë ndihmë mjekësore dhe sipas raportit mjekësor ka pësuar lëndime të lehta trupore.

I dyshuari është paraqitur më pas në stacionin policor dhe është intervistuar lidhur me rastin.

Me urdhër të Prokurorit të Shtetit, pas konsultimit me hetuesin kujdestar, rasti është iniciuar për veprat penale: “Keqtrajtim gjatë ushtrimit të detyrës zyrtare ose autorizimeve publike”, “Lëndim i lehtë trupor”.

Rasti është duke u trajtuar në procedurë të rregullt, ndërsa hetimet vazhdojnë për sqarimin e plotë të rrethanave.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.