Një punëtor rrëzohet nga kulmi, kjo është gjendja e tij shëndetësore – arrestohet pronari i kompanisë

Një incident serioz ka ndodhur të hënën në fshatin Babush i Muhaxherëve në Lipjan, ku një punëtor ka pësuar lëndime të rënda gjatë kryerjes së punimeve ndërtimore.

Siç mëson Sinjali, rasti është raportuar më 16.02.2026, rreth orës 09:00, kur Policia është njoftuar se një person ishte lënduar në vendin e punës. Njësitë policore kanë dalë menjëherë në lokacion bashkë me ekipin e Emergjencës.

Sipas informacioneve, i lënduari është T.M., rreth 27-vjeçar nga Shtimja, i cili kishte rënë nga kulmi i objektit ku po punonte për kompaninë BE Constracion SHPK. Ai është dërguar për trajtim mjekësor në QKUK, ku po vazhdon marrjen e ndihmës shëndetësore.

Në vendngjarje kanë dalë edhe njësia e hetimeve si dhe Inspektori i Punës, ndërsa janë intervistuar në cilësinë e dëshmitarëve pronari i objektit R.G, rreth 56-vjeçar dhe punëtori A.G, rreth 22-vjeçar.

Lidhur me rastin, është intervistuar edhe Besjan Murtezi, rreth 33-vjeçar, pronar i kompanisë në fjalë, i cili është trajtuar në cilësinë e të dyshuarit.

Pas konsultimit me Prokurorin kujdestar, rasti është iniciuar për veprën penale:

“Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, ndërsa ndaj të dyshuarit Besjan Murtezi është caktuar masa e ndalimit për 48 orë.

Hetimet për këtë rast janë duke vazhduar.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.