E dhimbshme: Alberti 23-vjeçar humb jetën në aksident

Albert Togu, personi që shihni në foto, është 23-vjeçari që mëngjesin e së hënës humbi jetën në spitalin e Traumës pas një beteje një javore si pasojë e një aksidenti rrugor.

I riu i cili u aksidentua një javë më parë në Gjorm të Kurbinit, teksa ishte duke udhëtuar në automjet me 2 persona të tjerë, nuk mundi t’u mbijetojë plagëve të marra.

Pas ndarjes së tij nga jeta, prindërit kanë kallëzuar në Prokurori mjekët e Spitalit të Traumës, duke i bërë përgjegjës për vdekjen e të birit.

Kujtim Togu, babai i 23-vjeçarit, ka deklaruar për mediat se djali i tij ka ndërruar jetë nga neglizhenca dhe se trupit të pajetë ende nuk i është bërë autopsia.

Sipas tij, mjekësia ligjore nuk mund të kryejë autopsinë pa kartelën e të ndjerit, e cila nuk është lëshuar ende nga Spitali i Traumës.

“Kam bërë një kallëzim në Prokurori se djali im ka ndërruar jetë nga neglizhenca e mjekëve, e kanë nënvlerësuar punën mjekët. Ato thonë që ka pësuar tromboze në zorrën e trashe, kur e bën operim thanë që kishin pankreasin, ishte i ënjtur, i skuqur dhe i ka krijuar shqetësime.

Të ishte ashtu, nuk krijon ndonjë probleme, kishte qenë i qartë, ata nuk e kanë kuptuar dhe ka helmuar organizmin. E kanë kuptuar kur mori fund çdo gjë. Unë kërkoj që nesër kam shpallur varrimin, kërkoj të marr kufomën, t’i bëhet autopsia. Unë nuk e bëj varrimin dot pa kufomë, këta nuk ma japin. Nxjerrin arsye pas arsye, ndjerin justifikime. Njëherë duhet kartela, njëherë nuk është kryeinfermieri, nuk e japin kartelën, nuk e di pse Spitali i Traumës nuk e jep kartelën”,përfundoi ai.