LAJMI I FUNDIT: Kosova shkon në rinumërim total
Komisioni Qendror i Zgjedhjeve ka vendosur të hënën që të rinumërohen në tërësi votat e zgjedhjeve të jashtëzakonshme të 28 dhjetorit.
Vendimi është miratuar në mbledhjen e radhës të KQZ-së të hënën, raporton Paparaci.
Po ashtu është vendosur që të shkarkohen përfaqësuesit politikë në Komisionin Komunal Zgjedhor në Prizren, ku sipas kreut të KQZ-së, Kreshnik Radoniqi, janë vërejtur dallimet më të mëdha në votat për kandidatët për deputetë.
Paraprakisht, KQZ kishte vendosur që në 28 komuna të rinumëroheshin vetëm 10 për qind e vendvotimeve, ndërkaq në 10 komuna të tjera të kishte rinumërim të plotë.
Vendimi i 19 janarit vjen pasi gjatë rinumërimit të pjesshëm u vërejtën dallime të mëdha në votat për kandidatët për deputetë në zgjedhjet e parakohshme parlamentare të 28 dhjetorit të vitit 2025
Pas zbulimit të këtyre devijimeve, partitë dhe organizatat e shoqërisë civile kërkuan rinumërim të plotë të votave.
