Hysen Durmishi me xhipa të zi në Vranidoll e llapjanët po presin në kolonë me orë të tëra

Deklarimi i ministrit të Infrastrukturës, Hysen Durmishi, për gjendjen e rrugës Prishtinë–Podujevë nuk përputhet me realitetin në terren.

Ai thotë se “si pasojë e reshjeve të shiut janë krijuar disa gropa” në by-pass-in te ura në Vranidoll, por në fakt nuk bëhet fjalë për disa gropa të izoluara, por për qindra metra rrugë të dëmtuar, që e ngadalësojnë seriozisht qarkullimin.

Kolonat e gjata nuk janë shfaqur vetëm pas reshjeve të fundit. Pritjet me orë të tëra në këtë segment po ndodhin prej muajsh dhe janë bërë pjesë e përditshmërisë së llapjanëve.

Shiu mund ta ketë rënduar situatën, por nuk është shkaku kryesor i bllokimit.

Ndërkohë që qytetarët presin në kolona, ministri shfaqet në terren me xhipa zyrtarë, duke folur për ndërhyrje dhe sanime, ndërsa problemi vazhdon. Arsyetimet me sezonin dimëror nuk ndryshojnë faktin se kjo rrugë, një nga më të rëndësishmet në vend, mbetet e vështirë dhe e lodhshme për mijëra qytetarë çdo ditë.