Të shtëna me armë në Kosovë, plagoset aksidentalisht e mitura

Një ngjarje e rëndë ka ndodhur mbrëmjen e sotme në Gjakovë, ku një vajzë e mitur ka mbetur e plagosur nga një plumb aksidental gjatë një incidenti me të shtëna me armë. Vajza, e cila ishte kalimtare e rastit, është goditur në shpinë dhe ka marrë lëndime.

Sipas informacionit të konfirmuar nga zëdhënësi i Policisë së Gjakovës, Sheremet Elezaj, ngjarja ka ndodhur rreth orës 21:25 në rrugën “Bardhyl Qaushi”. Ai shtoi se një person mashkull i moshës madhore dyshohet të ketë shtënë me armë zjarri në drejtim të disa individëve, me të cilët kishte pasur një mosmarrëveshje.

“Si pasojë e të shtënave, vajza ka mbetur e plagosur dhe është dërguar për trajtim mjekësor. Sipas personelit mjekësor, gjendja e saj është stabile,” tha Elezaj për Sinjalin.

Ndërkohë, i dyshuari për këtë incident ndodhet në arrati dhe njësitet relevante policore janë angazhuar në kërkimin e tij. Po ashtu, ata janë duke ndërmarrë veprimet hetimore për zbardhjen e plotë të ngjarjes.

Sinjali do t’iu mbajë të informuar me zhvillimet e mëtejshme të rastit.