Tragjedi e rëndë në Serbi: Dy persona me prejardhje shqiptare humbin jetën në aksident fatal

Një aksident i rëndë trafiku ka ndodhur në orët e para të mëngjesit të sotëm në autostradën Beograd–Niš, pranë Umçarit, ku dy persona kanë humbur jetën, ndërsa një tjetër ka mbetur i plagosur rëndë.

Sipas mediave serbe, automjeti i tipit “Seat” me targa gjermane ka dalë nga rruga në rrethana ende të paqarta dhe është përplasur fuqishëm jashtë karrexhatës. Dy persona, një burrë dhe një grua, janë nxjerrë pa shenja jete nga vetura, ndërsa personi i tretë është dërguar me urgjencë në spital.

Burime jozyrtare bëjnë të ditur se viktimat janë shtetas të Maqedonisë së Veriut, me prejardhje shqiptare. Identiteti i tyre ende nuk është bërë publik nga autoritetet.

Sipas hetimeve të para, dyshohet se shoferi mund të ketë rënë në gjumë gjatë vozitjes, çka ka bërë që automjeti të humbasë kontrollin dhe të dalë nga rruga. Policia serbe ndodhet në vendin e ngjarjes dhe po kryen hetimet për zbardhjen e plotë të shkaqeve të aksidentit.

Ekipet e emergjencës dhe zjarrfikësit kanë ndërhyrë menjëherë për nxjerrjen e të aksidentuarve nga automjeti i shkatërruar, ndërsa trafiku në këtë segment të autostradës ka qenë i vështirësuar për disa orë.

Ngjarja ka tronditur opinionin publik dhe rikthen në vëmendje rrezikun e lodhjes gjatë vozitjes, sidomos në udhëtime të gjata.