Zhduket 12 vjeçarja në Prishtinë

Një rast i personit të zhdukur është raportuar në Prishtinë, ku një vajzë e mitur nuk është kthyer në shtëpi që nga pasditja e së premtes, mëson ekskluzivisht Gazeta Sinjali.

Sipas informacioneve të siguruara, më 13.12.2025 rreth orës 18:00, në Stacionin Policor është paraqitur pala ankuese M.M., e cila ka deklaruar se vajza e saj e mitur O.M., 12-vjeçare, ka dalë nga banesa e tyre në rrugën “Lidhja e Prizrenit” më 12.12.2025 rreth orës 17:00 dhe që nga ajo kohë nuk është kthyer më.

Ankuesja ka deklaruar se nuk është në dijeni se çfarë kishte të veshur e mitura ditën e zhdukjes, ndërsa sa i përket gjendjes shëndetësore, ajo ka qenë në gjendje të mirë shëndetësore, raporton Sinjali.

Lidhur me rastin është njoftuar stafi kompetent, ndërsa pas intervistimit të ankueses është kontaktuar edhe Prokurori kujdestar për të mitur.

Me urdhër të Prokurorit, rasti është iniciuar dhe mbetet në procedurë hetimore si “Person i zhdukur”, ndërsa Policia po vazhdon veprimet për lokalizimin e së miturës.