Albin Kurti jep lajmin e madh që gëzohet gjithë Kosova

Kryeministri Albin Kurti ka ndarë lajmin e shumëpritur për sportdashësit në gjithë vendin: ndërtimi i stadiumit të ri të Suharekës, projekt me vlerë 11 milionë euro, po ecën me ritme të shpejta. Stadiumi do të jetë shtëpia e re e KF “Ballkanit”, skuadrës që ka përfaqësuar me dinjitet dhe sukses Kosovën në arenën ndërkombëtare.

Objekti i ri do të ketë mbi 6500 ulëse, duke krijuar kushte moderne për mijëra tifozë nga i gjithë rajoni që do të vijnë për ta mbështetur ekipin e zemrës dhe për të shijuar ndeshje të nivelit të lartë.

Ndërkohë që punimet për stadiumin kryesor vazhdojnë, fusha ndihmëse tashmë është përfunduar dhe është gati për përdorim.

Qeveria thekson se modernizimi i infrastrukturës sportive mbetet prioritet, me synimin që klubet, sportistët dhe tifozët në Kosovë të kenë kushte dinjitoze dhe standarde bashkëkohore për zhvillimin e sportit.

Stadiumi i ri i Suharekës pritet të shndërrohet në një prej investimeve më të rëndësishme për futbollin vendor.