Shpërthimi në veri, flet Albin Kurti
Kryeministri në detyrë i Republikës së Kosovës, Albin Kurti, ka kujtuar sulmin terrorist në kanalin e Ibër-Lepencit në Zubin-Potok, që ndikoi jashtëzakonisht shumë në infrastrukturën hidrologjike të vendit.
Kurti përshëndeti reagimin institucional të bërë fiks një vit më parë, duke thënë se veprimet profesionale dhe të suksesshme të institucioneve siguruan që të ketë rrjedhje të mjaftueshme të ujit për ftohjen e termoelektranave dhe mirëmbajtjen e prodhimit të energjisë elektrike.
“Në afat rekord prej vetëm një muaji akuadukti i dëmtuar u rindërtua, rrjedha e ujit bashkë me sistemin u rikthyen në kapacitete të plota operative.
Përgjigjja jonë dëshmoi aftësinë e lartë reaguese të ndërmarrjeve publike dhe institucioneve shtetërore.
Shteti dhe Republika triumfuan përsëri përballë grupeve ekstremiste dhe terroriste që mbështetjen e financimin e gjejnë te Beogradi zyrtar, e inspirimin dhe metodat i gjejnë te Rusia – sulmi ndaj infrastrukturës kritike në Ibër Lepenc i ngjasonte sulmeve ruse ndaj rrjetit energjetik të Ukrainës” u shpreh Kurti.
