“Oj nanë bre!” Shqiptarët hyjnë për të vjedhur, bien nga ballkoni dhe thyejnë brinjët

Një incident i pazakontë ndodhi në Drimos të Selanikut, ku dy hajdutë shqiptarë u plagosën rëndë pasi ranë nga një ballkon rreth 6 metra i lartë, gjatë tentativës për t’u arratisur nga banesa ku kishin hyrë me forcë.

Videoja e publikuar nga mediat greke tregon momentin kur ata humbasin ekuilibrin dhe përplasen në tokë, ndërsa dëgjohen britmat e tyre nga dhimbjet.

Sipas pronarit të shtëpisë, ai dhe bashkëshortja e tij u kthyen papritur në banesë dhe i gjetën hajdutët përballë në dhomën e ndenjes. Në përpjekje për t’u larguar, ata u varën nga kangjellat e ballkonit, të cilat u shembën nën peshën e tyre, duke i rrëzuar në tokë.

Fqinjët nxituan t’u jepnin ndihmë, ndërsa policia i arrestoi të plagosurit, të dy shtetas shqiptarë. Atyre iu gjetën bizhuteri dhe dy celularë të vjedhur. Të plagosurit u transportuan në Spitalin Papageorgiou, ndërsa policia po kërkon bashkëpunëtorin e tretë që u largua me makinë.